PANTUN BANJAR (ampun ulun sorang) – OKTOBER 2011

 

by Maria Roeslie on Thursday, November 3, 2011 at 12:35am ·
 
Basandar di tawing baduduk di watun

Tapajam tabuncalak mahawasi pina nanar

Harat jua kawalan bagawi manang batmintun

Ulun himung batapuk tangan banar

 

October 29 at 10:48am

 

Urang udik urang bukit

Bagigi kuat banyak manginang

Mudahan bujur ulun hibak duit

Mudahan sangkaan pian bujur banar

 

October 26 at 6:54am

 

Bakul duit hujan duit

Sambil balamut mananai duit

Mun hibak duit banyak nang barikit

Tunggal ikungan mamaraki badimpit

 

October 26 at 6:55am

 

Julak bukah banar pina kabuliyangan

Sambil bukah sambil mahanggung kayu

Awak pina kada nyaman asa kadinginan

Kanapa lah ini handak dapat duit banyak kah yu ?

 

October 25 at 10:09pm

 

Batamuan kawal bahari rami bapandiran

Kisah lagi anum sampai kisah badaki

Urang baik hibak kakawalan

Banyak kawal batuyuk rajaki ( yoyok )

 

October 25 at 6:49am

 

Galuh bungas balimpas banyak nang malilik

Dari urang hidup sampai urang mati

Ada pulang dingsanak nang tabulik

Banyu mahakam dasar sakti

 

October 25 at 6:40am

 

Julak bindringan liwat bunyinya garancaian

Bulang bulik tarus asa mambari maras

Lawas kadida habar apalagi batamuan

Apakah habarnya dingsanak bungas (aida rosehan)

 

October 25 at 6:37am

 

Jangan manginum banyu kubukan

Minum haja nang bangaran tih lapas

Nyamannya ai urang nang baisi duit kabanyakan

Mun takumpulan kada lagi haur batatapas (frame)

 

October 25 at 6:30am

 

Bilungka sayur bilungka batu

Pina nyaman bubuhannya ai kadua nya

Nah ham bujur pulang sidin tu

Biar ditukari nang batakun tapainya ( Hadi Jakalolo )

 

October 23 at 2:15pm

 

Harau ada pulang kapal tarbang tagalingsir di Balikpapan

Lapangan jar ditutup satumat mahadang mambaiki

Takantuk kantuk ulun di Jakarta mahadang kiauan tulakan

Maka ulun sudah dihadangi banar wan anak laki

 

October 23 at 2:09pm

 

Tatawakah manangiskah tatap tarimakasih

Itu ngarannya panikmat hidup

Wayah hini ngalih mancari acil pambarsih

Basukur tarus biar tahantup (nancy)

 

 

 

Acil bapantun duduk di batang

Julak bacungkung mangait bidawang

Rami bakumpulan rasa mambujang

Umur nang tuha jangan diganang ( lanny )

 

October 20 at 8:39pm

 

Amun sarik jangan disimpan apalagi sampai mambatin

Lakasi bawa manginum wan batampungas

Huma ai baliuran nah mandangar iwak patin

Babila jua ulun dibawai bubuhan acil bungas (rosalia p)

 

October 19 at 11:24pm

 

Mambungun niur gugur tadapat niur gumpa

Padahal sudah basangu dua buting iskan

Ui datu sabarataan jangan pina lawas batapa

Kalu pina kadut duit kahibakan (finger frame)

 

October 19 at 10:59pm

 

Lamah lintuhut talihat jalanan hibak papaci

Rupanya ada nang tarumpak kaca mutur

Tuhuk jua sudah matan bahari ulun baaci

Pina kadida ubahnya batis maka pina katur

 

October 19 at 10:51pm

 

Awak uyuh nyaman barandam

Sambil barandam sambil manggintas

Galuh bungas bagambar bakacamata hitam

Dasar bungas biar bagaya apa haja tatap bungas (mila yusnita)

 

October16 at 7:19pm

 

Bujur pian undang babanam nang dijuwal

Tatitik liur mangganang warung simpangan

Lain pulang kisah undang nang dihuwal

Bisa banar pian mambuang katulangan (finger)

 

October16 at 7:07pm

 

Gusti Ellvian N. R

handak mahadang di higa karung….

hadang dulu jangan di hual…..

ulun dasar bujur bisi undang di warung….

undang di warung gasan di jual…..😀

 

October16 at  6:54pm

 

Mangulum karipik lawasnya jadi lamah

Apalagi mun rangginang nang dikulum

Biar acil takulipik kasadakan asal jangan bukah

Apalagi mun ulun datang pian kada manggarunum ( lanny angelita )

 

October 16 at 6:33pm

 

Lanny Angelita

Karipik di kulum hanyar dimakan

gulali nya kacil diganti lawan rengginang

Takulipik ulun manginum kasadakan

Sakalinya ada acil nang mengganang

 

October16 at 4:34pm

 

Kaingatan di surabaya rami bakumpulan

Bubuhan banjar bakisahan mandangani

Babila jua lah batamuan lagi wan acil giok lan

Ulun himung banar bila tatamu wan sidin laki bini ( lanny angelita )

 

October 16 at 1:01pm

 

Tuhuk ulun bakuciak mahalulung

Sampai urat gulu tatarik pina kancang

Lawas kada barawaan wan acil tjung fung

Apakah habar nya di banua subarang (tan tjung fung)

 

October 16 at 12:49pm

 

Kalu anak pina ladar lakasi tiup bumbunan

Nangitu kabiasaan kita mun tinggal di banua

Mun acil wan julak bungas handak bajalanan

Jangan tatinggal ulun di hirit jua (rita budiharto)

 

October 16 at 12:39pm

 

Tapaling paling kapala biar digusari

Tatap haja mata maitihi wan muntung manggarunum

Mun ading nang ini dasar bungas matan bahari

Kada takangkisan mata nang maitihi takagum kagum (shierley gunadi)

 

October 16 at 12:32pm

 

Lawas sudah ulun kada manginum janar

Padahal liur sudah managih bilang liwar

Kanapa lah hari ini ulun asa himung banar

Pina lancar manulis pantun banjar

 

October 16 at 12:22pm

 

Mun waluh rabah ulun kada takajut

Mun baringin di lapangan bola martapura rubuh ulun taluncat

Bisa banar julak bini bajalan bakinjut

Jangan talalu kinjut kalu pina balancat (finger)

 

October 16 at 12:13pm

 

Manisan kadundung bacucuk bilah

Kacar liur ulun mamikirannya

Umai umai pasaran datu gusti magin batinggi lah

Bilang hapus tambah umur tambah basantan rupanya (finger)

 

October 16 at 12:01pm

 

Edy Santosa

Buah kadundung cucuknya gasan manisan

Kada sembarang manisan mamacah liur parasa

Badagup jantung mahadang kakanda Gusti Ellvian

Cinta adinda takkan padam sampai akhir masa…….. cieeeeeee😉

 

October 16 at 11:18am

 

Ayuha ulun tukarakan sasapu jangan bamamai

Asal jangan pian suruh ulun mahaga itik

Jangan nangkaya itu datu gusti ai

Pian lah bisa banar undang bapadah ratik (finger)

 

October 16 at 11:45am

 

Gusti Ellvian N. R

Nukar bordir andak dibaju

Ulun batitip tukar akan sasapu….

Lain order buhan kami ini masih kada payu….

Tapi gara2 rancak mati lampu…..

 

October 15 at 11:40pm via mobile

 

Edy Santosa

Manukar galapung adanya di muara

galapung nang putih ulahan mama Ruslian

Kada sumbarang hinip bu ai buhan martapura

Munnya mati lampu lalu ja indehoian…wkwkwkwk

 

October 16 at 10:59am

 

Manukar galapung di muhara gang

Biar parak tatap basapida rami garancaian

Mun nang kaya itu pian cagar mahalusi pulang

Tagal rami jua banyak suara kakuciakan (finger)

 

October 16 at 11:37am

 

Liwar lapar sampai makanan bakarik

Parut baganal mun hibak wan lakatan

Mun talihat nang kada biasa jangan bakirik

Lain kisah mun urang nang bacucuntan

 

October 15 at 11:30pm

 

Paling galianan mun talihat ulat kariwitan

Apalagi mun pina hibak sagaduran

Kahandak hati tatarusan manyanangakan hati kuwitan

Mudahan tuntung dingsanak barataan biar bakarubutan

 

October 15 at 11:24pm

 

Jangan bagaringan biar kada ngalih urang maharagu

Apalagi mun cariwit pastilah urang garigitan

Kanapa pian sampai kada kaingatan malam minggu

Haur bapisbukan kah haur bagawian (bunda Al-Ar)

 

October 15 at 10:51pm

 

Galuh kadinginan sampai bakalumbun

Pina gagaringan atawa pina manja

Jangan talalu sarius pian maitihi pantun ulun

Ulun kada sarik pang hanyar bapantunan haja

 

October 15 at 10:40pm

 

Tahunjur batis mahadang gagatas

Harau nang liwat hanyar jaring wan bubur babigi

Mun ada muntung nang lantih lakas digintas

Biar jara sabakasan kada mahadu urang lagi

 

October 15 at 10:34pm

 

Bangku tahambur tuntung baacara

Acara basaruan sampai bajimusan

Pina hinip urang nang di martapura

Batuyuk urdiran gawian kada katangkisan (finger)

 

October 15  at 10:27pm

 

Nyaman wan harum awak habis batimung

Apamun bakasai banar tuntung sabuku

Uyuh wan lapah duduk bacungkung

Apamun umpat mambaca garatisan di wadah nang bajual buku

 

October 15 at 10:21pm

 

Kai juhing mamarut janar mangganii nini

Apamun si galuh garing jar pina ladar

Kada purun pang mandangar kawal bapisahan wan bini

Mudahan masing  masing lakas sadar

 

October 15 at 7:14pm

 

Haur banar sampai kawal baranak kada tailang

Mudahan sidin kada bakuciak

Panumpang kapal tarabang jadi kurban pulang

Ada kapal tarabang nang batal tulak

 

October 15 at 7:09pm

 

Sungsung julak  pina sutil baaksi banar bakurinah

Sakalinya handak jadi saksi ijab kabul di banua

Biar wadah urang pina magah wan miwah

Nyaman bagulang guling di kalambu surang jua

 

October 15 at 9:10am

 

Guring nyanyak bamimpi manyasah maling

Sakalinya gugur mandabuk tatindih umanya

Ampat malam guring bapaluk guling

Malam ka lima ulun rindu palukan abahnya

 

October 14 at 10:41pm

 

Pura pura badiam sakalinya manyuhuk

padahal salawas ini kalihatan kada pawanian

awak manggaring tagal gawian satuyuk

adakah dingsanak nang handak mangganii bagawian

 

October 14 at 7:04am via mobile

 

Siang malam kaganangan wan dandaman

Dandaman nang di rumah guling wan bantal

Malam tadi umpat bagadang samalaman

Apamun haur mamusuti batis anang nang gatal

 

October 13 at 12:46pm

 

Satua nang mambari muar tikus curut wan kacua

Apamun mahambur bau wan panyakit

Amun anak garing ulun asa garing jua

Habis pang umpat jua bamalam di rumah sakit

 

October 11 at 8:33pm

 

Harau si aluh sumbarang baduduk asal taandak

Kada singhaja tasinggul sambal acan wan gangan waluh

Hanyar sakali handak umpat baramian mangudak

Ulun kada tahu nih pina haur wan kipuh

 

October 8 at 10:09pm

 

Karas wasi karas lagi batu

Balincai kanji bahambur galapung

Ulun gin rindu banar wan bubuhan datu

Dangani mandu’akan biar ulun lakas bulik ka kampung

 

October 8 at 9:44pm

 

Bangun sungsung kaingatan haruan baubar

Untung banar ada dingsanak nang maundang makan tangah hari

Kakawalan nang kada taundang sidin harap sabar

Lakasi mandaptarakan diri jangan bahiri

 

October 8 at 10:05am

 

Mamusut kudakan sambil baduduk di watun

Kalu pang ada galuh bungas liwat nang pina ranum

Jangan manunggu tasingkap haja mun bapantun

Mun ada nang tajarungkup gin lakasi manggarunum

 

October 8 at 8:22am

 

Kahandak hati bajalanan sampai ka bulan

Lamun kadida kandaraan nang disiwakan kawa ma’antas

Sungsung sudah pina satup satup mutur di jalan

Padahal ulun banyak gawian handak badadas

 

October 7 at 8:03am via BlackBerry

 

Tarabah awak di tilam nang mati kapuknya

Rasa rakai pas bangun guring baisukan

Biar subuh gin abahnya manggarak umanya

Dikira handak bahapa sakalinya minta dikikisakan

 

October 6 at 11:58pm

 

Kada singhaja tajajak batis julak karas nangkaya batu

Padahal bajalan haja sidin dipigangin wan dituntun

Nang kaya apa lah kita manggabungakan pantun wan putu

Bisalah mamutu sambil manggarunum bapantun

 

October 6 at 11:30pm

 

Baluman musim buah pina banyak mangga bagalantungan

Sakali di’itihi harau buah palsu nang ba’andakan

Ui dingsanak nang jauh di pahuluan

Nangapa jua habar pian pian barataan

 

October 6 at 11:21pm

 

Jarang ada duktur nang kada mata duitan parah

Hanyar tadi tatamu waktu mambawa hans bapariksa

Ujar sidin kada usah babayar kaina isuk haja mambawa hasil darah

Padahal sidin sudah manjapai japai wan mamariksa

 

October 6 at 10:44pm

 

Mun haruan bacampur cuka apalah rasanya

Ulun tabiasa wan limau kuwit nyamannya

Ampun julak gusti ulun nih kadida apa apanya

Apalagi mun ditandingakan wan pian pian nang ahlinya

 

October 6 at 8:26am

 

Maulah wadai lawan hintalu wan galapung

Tapaluh awak sampai nangkaya urang batimung

Rami bamakanan bakacak bakipung

Parut asa kanyang apamun hati himung

 

October 5 at 10:18pm

 

Limbah mandangar kisah sidin pina balain

Taganang ganang bahari manyasah umanya

Amun pian pian manalipun urusan nang lain

Apalagi urusan kisah sakulah bahari lain pulang kisahnya

 

October 3 at 10:59pm

 

Magin tuha magin kuat sidin bagadang

Nang anum kalah tadah dapatnya tabingung bingung

Himung ulun banar mandangar kisah kalayangan dandang

Taingat bahari mun tangah malam suaranya nyaring mandangung

 

October 4 at 9:28pm

 

Wayah hini mun talihat cacing ulun galianan

Padahal bahari wani mangacak wan maikat

Ampun maap wan kawalan nang manalipun urusan gawian

Amun sudah malam wan di rumah ulun ngalih ma’angkat

 

October 3 at 8:45pm

 

Amun banyak angin nyaman bakalayangan

Amun angin kada daras kita bamain kalikir

Hati pusang mun anak bagaringan

Utak pumput kada kawa dibawa bapikir

 

October 2 at 12:54pm

 

Jaman bahari saraup bombon baharaga salawi

Wayah hini amun salawi dapat bungkusnya haja

Hari paray asa mambungul kadida nang digawi

Bulang bulik ka dapur haur bagarungkap haja

 

October 2 at 12:37pm

Leave a comment

Filed under Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s