PANTUN BANJAR (ampun ulun sorang) – AGUSTUS 2011

 

by Maria Roeslie on Thursday, September 1, 2011 at 9:16am ·
 
Kada usah batulakan mun duit babaya nya

Labih baik badiam haja di palindangan

Biar ulun kada bahari raya

Ulun umpat jua bailang ilangan

 

August 31 at 8:12am

 

Mun mudik jangan nang babahaya

Ambil kandaraan nang aman nyaman

Uiiii dingsanak nang bahari raya

Maap lahir batin sabarataan

 

August 31 at 7:31am

 

Cucu julak subarang manangis manggaraung

Handak babaju hanyar kada sabar manunggu isuk

Ulun bingung jua malihat kawalan bingung

Handak bahariraya isuk kah damisuk

 

August 29 at 11:00pm

 

 

Biar pamamaian sampai munyak

Sidin tu ranjarakan wan panaguran

Dingsanak nang di kaltimpost ulun tarima kasih banyak

Tabuat jua ulun hari sumalam di kuran

 

 August 29 at 7:07am via mobile

 

Lagi anum sudah manggah

pas tuhanya bapanyakitan

Asik jua baisi kawal tuha tapi ungah

nyaman di’ulay gasan baramian

 

August 28 at 6:35am via mobile

 

Babarasih rumah basasapu basisikat

Jangan bajajurak hajalah

Kalu pina macam macam kita sikat

Atau kita himungi hajalah

 

August 24 at 7:59pm

 

Sudah tuha wani banar balanjaan bukah

Kai Nini tabaling kungkang dapatnya

Dasar sidin tu pina karas muha wan cakah

Bisa ai marasa panyugih wan paharatnya

 

August 24 at 6:28pm

 

Sambil bakunyung sambil manyalam

Sama wan bakunjangan bajalanan

Himung ulun mun sampat unlin tiap malam

Bakat tasalur kawa bataguran wan kawalan

 

August 23 at 11:32pm

 

Lawas sudah mangganang tiwadak

Tagal pang lagi kada pas musim na

Ulun gin nangkaya pian jua banyak kahandak

Tagal kamampuan baluman sampai ka sana

 

August 23 at 6:00am

 

Lagi anum banyak balajar

Sudah tuha banyak dusa

Julak subalah handak balajar bapantun jar

Padahal ulun gin hanyar babaya bisa

 

August 22 at 10:26pm

 

Kahandak makan balinju manis

Tagal gigi hibak tambalan

Uii dingsanak nang bungas manis

Mudahan laris manis jualan (rossy)

 

 

 

Manungap buras taganang laksa

Sama haja pang bakuah gangan

Bulan puasa banyak jua nang kada tahu basa

Main latupan batangah malam rahat urang guringan

 

August 20 at 3:00pm

 

Bamasak di atang dapur apinya cancurupan

Mun di kumpur gas takutan jadi latupan

Jar pang binian harus kalihatan panyupan

Biar lalakiannya jadi panasaran🙂

 

 

 

Jangan talalu hanyut kaina kalimpatan

Ngalih babulik malawan arus

Awak nang uyuh dibawa bagawi sarabutan

Ibadah ramadhan lanjut tarus

 

August 20 at 9:19am

 

Rami badudukan di atas watun

Sambil mangganang dingsanak nang di lampung

Ayu pang dingsanak ita babalas pantun

Biar rami jua pisbuk sambil maingat kampung

 

August 20 at 12:43am

 

Iwak sapat diulah wadi

Harau kacar ulun baliuran

Nah takaluar jurus pantun julak hadi

Ulun kada wani mangudak mun gasan pian

 

August 20 at 12:19am

 

Satua nang baduri bangaran landak

Mun dicaburakan langsung tinggalam

Asa lawas sudah kada mangudak

Ayu pang kita hanting malam

 

August 20 at 12:02am

 

Banyak muntung banyak dusa

Banyak gawian banyak duit

Amun pintar bahitung apalagi saraba bisa

Pasti banyak nang maincar dan mangait

 

August 19 at 1:15am

 

Mamilih kuini takutan bapira

Wani hangit bapanas bajamuran

Miriis hati malihat di tipi urang urang kada ingat mamasang bandira

Kanapa manunggu disuruh lah kadida kasadaran

 

August 18 at 7:11am

 

Si pandir bakaliling manguntrul hartanya

Hartanya bajibun masih kada puas haja

Pandiran bujur wan mangaramput kadida bidanya

Itu pang katuhukan mambunguli urang haja

 

August 17 at 2:50pm

 

Magin lawas baramian tujuh balasan magin langka

Padahal kakanakan himung barataan

Mudahan kada hanya ucapan haja Mardika !

Ayu kita bajuang supaya nyaman sabarataan

 

August 17 at 6:57am

 

 

Kadida duit kapala pusing

kada kawa batukar iwak hintalu

Bapuasa itu kasadaran masing masing

kada bulih bapaksaan kalu

 

August 16 at 6:41am via mobile

 

 

Batampai bamakanan kada tahu dibasa

urang puasa kada diganang

Kajadian umpat umpatan bapuasa

parut asa tapulintir mata asa bakunang kunang

 

August 15 at 8:48pm via mobile

 

 

Tatitik liur mahadang bukaan nasi iwaknya

padahal sudah waktunya batal

harau sakalinya hanyar mangipas baranya

padahal parut sudah rasa digantal

 

August 15 at 6:45pm via mobile ·

 

Kagangangan wan iwak karing,

Tacium harumnya sambil lalu

Hati ayam bulih haja karing,

Hati kita harus sajuk kalu ?

 

August 14 at 2:01pm

 

Iwak samu iwak wadi

Tatitik liur malihat wadahnya langis

Imbah bamasak langsung disadi

Himung malihat kakanakan langsung mahantup habis

 

August 14 at 1:56pm

 

Kapingin mandai kada tahu cara maulahnya

Mun damintu mahadang urang ma’antari haja

Daripada mamikirakan nang kada tahu ujung pangkalnya

Labih baik kita bapantunan haja

 

August 14 at 5:30am

 

Main ayunan mangidam kalalapun

Pas  liwat panjuall itik sariti

Sungsung guring sungsung bangun

Sigar awak sigar hati

 

August 14 at 5:25am

 

Tipi lagi hot nih lawan si udin

Ada nazar, ada sarip, ada siapakah lagi

Harau sungsung ulun tapikir sidin

Lumayan manambah tulisan di pisbuk lagi

 

August 12 at 6:18am

 

Ada kartak hanyar ada kartak baru

Amun di tarjamahakan sama haja artinya

Magin dibiarakan sidin magin maharu haru

Baiknya dipadahakan haja wan umanya

 

August 12 at 5:59am

 

Hari bagawi harus sarius

Mun paray wayahnya bakunjangan

Kalu puasa banyak nang bakurus

Padahal sahursudah makan bakayangan

 

August 10 at 8:08pm

 

Banyak gambar lalakian babuka baju

Apa jua kah nang ditampaiakannya

Padahal bagus nang langkap babaju

Kacuali  bungas awak pada muha nya

 

August 9 at 9:17pm

 

Babaju hanyar bahan satin

Batapih hanyar jua pasangannya

Mun puasa lahir puasa batin

Itu nang bujur bujur puasa ngarannya

 

August 9 at 6:51pm

 

Tapajam tabincalak taitihi sinar

Silau kada mangaruan samunyaan

Bujur ulun himung banar

Malihat dingsanak rakat barataan

 

August 8 at 10:44pm

 

Lagi halus  mambungun busu baras

Wayah hini manukar di pasar haja

Dasar tuha bangka suka mangaras

Biar salah gin bujur tarus haja

 

August 8 at 8:19pm

 

Kapingin ka pantai main salancar

Maulah rancana piknik  ka balikpapan

Satatus julak maulah ulun kacar

Baung bapais wan cacapan

 

August 8 at 6:54am

 

Sungsung ulun mambuka pisbuk

Sakalinya banyak nang baulang tahun

Mudahan banyak rajaki malibuk

Jangan lupa mangirimin ulun mie bihun

 

August 8 at 6:27am

 

Bulan puasa banyak warung sakadup

Itu ngarannya tuliransi jar urang wayah ini

Sudah tuha babukahan harau tajarungkup

Kanapa garang kada maingat diri sudah nini

 

August 7 at 6:56am

 

Mulanya sidin biasa haja

Pas ditinggal akan bini jadi layau

Cuba maulah bingka jadi haja

Tagal kadida rasa hambar kayau

( hahahahaha katahuan nam kada bisa bagawian )

 

August 6 at 7:11pm

 

Dairah sutomo kabaran hibak kalalatu

Lampu mati pas ai kadap banar

Kanapa lah pagi ini utak pina buntu

Handak bapantun pina ngalih banar

 

August 6 at 8:07am

 

Maadon wadai kada sing kamir

Padahal gasan kawal babuka puasa

Biar bagus gin kada udah pamir

Apalagi mun di bulan puasa

 

August 6 at 12:26am

 

Iwak lais iwak balanak

Main tali main saman

Rasa tatangis mambaca pisbuk dingsanak

Kada kawa guring mandangar laduman

 

August 5 at 11:59pm

 

Nyaman banar amun baupang

Apalagi mun baupang wan bubuhan jua

Duit ku duit ku tu pang

Duit laki duit ku jua🙂

 

August 5 at 10:59pm

 

Batis gatal handak manggaruk

Takutan pulang kalu bakumang

Bangun sahur taganang cingkaruk

Untung pas ada cingkaruk wan lamang

 

August 5 at 7:05am

 

Mun manyambati urang banyak dusa

Baik baramian manyiang mandai

Ulun himung mun bulan puasa

Umpat batajir di pasar wadai

 

August 4 at 10:53pm

 

Taganang babungku ilat bakicap

Maginnya pundut pisang ulahan kuitan

Pambakal subarang sampat baucap

Dingsanak barataan jangan umpat umpatan

 

August 4 at 10:45pm

 

Warik bamban gawiannya bagantung

Lain pula wan bakantan kula nya

Puasa napsu puasa muntung

Biar langkap bujur puasa nya

 

August 4 at 5:54am

 

Biar kakanakan umpat mahaur

Nang tuha harus mahaga

Tabangun subuh umpat basahur

Sigar awak sungsung baulahraga

 

August 4 at 5:39am

 

Tulak ka pasar naik bica

Sampai di pasar manukar kain

Mun pantun suah tabaca

Kada handak mambaca nang lain < narsis…🙂

 

August 2 at 8:44pm

 

Pacah bisul asa marantan

Marinyut banar sakit rasanya

Mudahan tadi puasa barataan

Kadada nang pacah puasanya

 

August 1 at 6:46pm

Leave a comment

Filed under Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s